கண்ணப்பன் vs மூர்த்தி!

தமிழக சட்டசபைத் தேர்தலை நடத்த எந்த நேரத்திலும் தயாராக இருக்கிறோம் என தலைமைத் தேர்தல் கமிஷனர் நவீன் சாவ்லா அறிவித் திருக்கும் நிலையில்.... இப்போதே சீட்டுப்பிடி யுத்தங்கள் சகல கட்சிகளிலும் ஆரம்பித்துவிட்டன. தொகுதி சீரமைப்புக்கு ஏற்றபடி தங்களுக்கு எந்தத் தொகுதியில் வெற்றி வாய்ப்பு இருக்கும் என்ற கணக்குகளோடு... கட்சிப் பிரமுகர்களும் தொகுதிகளைக் குறிவைத்து சுற்றிவர ஆரம்பித்துவிட்டார்கள்.

இவர்களின் வரிசையில் மாஜி அ.தி.மு.க. அமைச்சரான கண்ணப்பனின்... ஒட்டுமொத்த பார்வையும் மதுரை கிழக்குத் தொகுதியின் பக்கம் திரும்பியிருக்கிறது. தனது இளையான்குடி சட்ட மன்றத் தொகுதி வரும் சட்டசபைத் தேர்தலில் நீக்கப்பட்டுவிட்டதால்... 40 சதவீதத்திற்கு மேல் இருக்கும் தனது யாதவர் சமூகம் கைகொடுக்கும் என்ற நம்பிக்கையில்... மதுரை கிழக்கின் மீது காதலாகிவிட்டார் கண்ணப்பன்.

இதற்காக சிவகங்கை வீட்டைக் காலி செய்துவிட்டு.. மதுரை ஐயர் பங்களா பகுதியில் ஒரு மெஹா சைஸ் வீட்டை விலைக்கு வாங்கி.. அதில் குடியேறியிருக்கிறார். கட்சியில் யார் யார் சீட் கேட்பார்கள் என லிஸ்ட் எடுத்து இப்போதே அவர்களைத் தன் ஆதரவாளராக ஆக்கும் முயற்சியிலும் இறங்கிவிட்டார். ஒதுங்கி இருக்கும் ர.ர.க்கள் மற்றும் யாதவ சமூகப் பிரமுகர்களைத் தினசரி தேடித்தேடி சந்தித்துப் பேசி வரும் கண்ணப்பன்... தொகுதிக்காரர்கள் வீட்டில் நடக்கும் அத்தனை நல்லது கெட்டது களிலும் கலந்துகொண்டு... தொகுதி மக்களை வசீகரித்து வருகிறார். சேடப்பட்டி மாற்று முகாம் போய்விட்டார். காளிமுத்துவை இயற்கை அழைத்துக்கொண்டுவிட்டது. வளர்மதி ஜெபராஜோ கட்சியினர் மத்தியிலேயே தனது ஒளிவட்டத்தை இழந்து நிற்கிறார். இந்த நிலையில் தனக்கென்று ஒரு இமேஜை வளர்த்து வைத்திருக்கும் கண்ணப்பன்... இங்கே வந்து அரசியல் செய்வது எங்களுக்கெல்லாம் தெம்பை ஏற்படுத்தியிருக்கிறது''’என்கிறார்கள் லோக்கல் ர.ர.க்கள்.

இதேபோல் சூரியத்தரப்பைச் சேர்ந்த மா.செ.மூர்த்தியும்... தனது சோழவந்தான் தொகுதி நீக்கப்பட்டு அது சமயநல்லூர் தனித்தொகுதியாக நிறம் மாறுவதால்... மதுரை கிழக்கையே குறி வைத்திருக்கிறார். கண்ணப்பன் பாணியில் இவரும் ஐயர் பங்களா பகுதிக்கு குடியேறி... பரபரப்பாய் இயங்கிக்கொண்டிருக்கிறார்.. அழகிரியை அடிக்கடி விழாக்களுக்கு அழைத்து கட்சிக்காரர்களையும் தொகுதிவாசி களையும் தன்பக்கம் ஈர்க்கும் முயற்சியில் இருக்கும் மூர்த்தி... கண்ணப்பனுக்கு சகல விதத்திலும் ஈடுகொடுப்பார் என்ற எதிர்பார்ப்பு பரவலாகவே நிலவுகிறது. இதற்கிடையே அழகிரியின் செல்லப்பிள்ளைகளில் ஒருவர் என உடன்பிறப்புக்களால் கருதப்படும் வழக்கறிஞர் சந்திரசேகர்... "எங்கள் யாதவ வாக்குகள் கண்ணப்பனுக்குப் போகாமல் இருக்க... எனக்கு சீட் கொடுங்கள்' என அழகிரியிடம் மனு போட்டுக்கொண்டிருக்கிறார்.

பலரும் மதுரைக் கிழக்கைக் குறிவைத் தாலும்... தற்போதைய நிலையில் இலைத் தரப்பில் மாஜி கண்ணப்பனும்... சூரியத் தரப்பில் மா.செ.மூர்த்தியும் தொகுதியில் தேர்தல் வேலைகளை ஆரம்பித்துவிட்டார்கள்.